مواقف

موقف رقم 1: "أشققت عن قلبه؟؟!!"

المكان: الأتوبيس فى الكرسى اللى جنب السواق فى شارع الهرم.

الزمان: مش فاكر، من أسبوع تقريبا.

سواق الأتوبيس له لحية نصف نامية، لكن كافية ليطلق عليه التباع : يا شيخ. عالرصيف ماشى شاب شعره طويل لحد كتفه تقريبا و لابس بنطلون "بنتاكور" قصير لحد نص السمانة تقريبا و حاطط سماعة فى ودانه.

و السواق مرة واحدة كأنه أتكهرب، شايف يا أستاذ الشباب بص الواد عامل فى نفسه إيه، ده حتى مش باينله إذا كان راجل ولا مرا !

بذمتك ده لو مات دلوقتى هيقول لربنا إيه ؟؟!!

بصيت للواد كده وقلت فى - سرى طبعاً ! - و انت مال أهلك !! ما يلبس اللى يلبسه (شوفتوا أنا جامد إزاى) ! :)

أنا ما فكرتش أرد عليه و لا أوجع دماغى مع العقلية الهلامية اللى لو ما اتفقتش معاه بعد ما أنزل -أو قبل- هاخدلى شوية حلوين زى بتوع الواد اللى لا بيه ولا عليه.

 شوف السواق و النظرة الفوقية المتعالية و السطحية فى الحكم على الناس، أنا حبيت أبص للولد نظرة تانية -بغض النظر عن الحرية الشخصية- لو بصينا ليه من وجهة نظر دينية !

1- الولد شعره طويل، و -على حد علمى- الرسول عليه الصلاة و السلام كان شعره طويل يغطى كتفيه.

2-البنطلون قصير ! ، ممكن -والله أعلم- الولد يكون مقتنع إن دى سنة عن النبى -عليه الصلاة و السلام-

3-السماعات، ممكن الولد كان بيسمع قرءان.

يعنى باختصار، بشوية حسن ظن و عدم تسرع فى الحكم على الناس الولد ده كان ممكن يكون ملاك يمشى على الأرض.

 **********************************************************************************

موقف رقم 2 :

تصوير العبد لله!، ميناء الدخيلة-الأسكندرية

كنت رايح لتأجير مركب صيد أنا و اتنين أصحابى من أيام الكلية. على حظنا اليوم ده كان خفر السواحل عليهم تفتيش و مغلسين على المراكبية إن لازم كل واحد يلتزم بالعدد القانونى-اللى مش جايب همه طبعا-اليوم ده بالذات.

موضوع العدد ده على ما اتحل فضلنا ملطوعين ساعتين عالشاطئ، هنا لقيت واحد من اللى معايا بيقول أنا حاسس إن ده فأل مش كويس أو إشارة إننا ما نطلعش !!! نعم يا أخويا !! أخدتها بهزار و عدت.

ركبنا المركب -أخيرا- لقيتهم -الاتنين- بيقولولى إيه رأيك نرجع ولا إيه، لأ! -أنا طبعا- .

الراجل جه يدور المركب المركب ما دارش !! المارش عطلان يا أفندية. و لقيت أصحابى خلاص على يقين تام إن دى إشارات من الله إن الدواء .. قصدى البحر خطر و لازم نرجع، يعنى كل اللى طلعوا قبلنا دول ولاد الكلب واحنا اللى مكشوف عننا اللحاف، قلتلهم: عادى يا جماعة إيه المشكلة، من إمتى الدنيا بتمشى smooth و حلاوة كده، بتحصل مشاكل وارد، عادى يعنى، احنا لا طالعين نعمل حاجة غلط ولا حرام، هناخد مركب تانى و نتوكل على الله، الحمد لله سمعوا كلامى و طلعنا و كل واحد فيهم طلعله ييجى اتنين تلاته كيلو سمك ، و أنا جالى دوار بحر !!! :o$